विभाग सातवा : अर्थशास्त्र ते आफ्रिका

अर्थशास्त्र  – अर्थशास्त्र हा शब्द फार जुना आहे.  या विषयावर संस्कृतमध्यें अनेक ग्रंथ आहेत.  त्या सर्व ग्रंथांत चाणक्याचा ग्रंथ ( कौटिल्यनीति ) सुप्रसिद्ध आहे.  हा ग्रंथ अलीकडेच सांपडला आणि त्याचा पद्धतशीर अभ्यास बराच झाला आहे, तरी अजून बराच व्हावयास पाहिजे आहे.  राज्याचें बलाबल मोजण्यासाठीं अर्थशास्त्राचा उपयोग असे आणि याचें महत्त्व इतकें मोठें मानलें जात असे कीं, धर्माच्या खालोखाल हा पुरुषार्थ आहे, असें प्राचीन पंडीत समजत असत.